Հայ Առաքելության եկեղեցու բարձրագույն ղեկավարությունը ձախողել է հոգևոր առաջնորդությունը, հայտարարեց Հայաստանի վարչապետ Նիկոլ Փաշինյանը մայիսի 7-ի մամուլի ասուլիսին։
«Եթե որոշ հոգևորականներ քաղաքական հայտ են ներկայացնում, ապա դրանով նրանք խոստովանում են հոգևոր առաջնորդության գործում իրենց ձախողումը կամ անկարողությունը», – հայտարարեց Փաշինյանը՝ վստահեցնելով, որ «իշխանությունը չի հակամարտում եկեղեցու հետ»։
Վարչապետի խոսքով՝ հոգևոր առաջնորդություն իրականացնող հոգևորականների կողքին կան նաև հոգևոր առաջնորդությունը ձախողած և քաղաքական հայտ ներկայացրած հոգևորականներ։
«Բարձրաստիճանների մեջ էլ կան բազմաթիվները, ովքեր իսկապես հոգևոր առաջնորդությամբ են զբաղված, բայց, վախենամ, որ ամենաբարձր մակարդակում հենց հոգևոր առաջնորդությունն են ձախողել», – ասաց Փաշինյանը։
Ասածը կառավարության ղեկավարը փորձել է հիմնավորել սեփական փորձով՝ պատմելով, որ բազմաթիվ շփումների ժամանակ [բարձրաստիճան հոգևորականները] «Աստվածաշնչի, Նոր կտակարանի, դավանաբանական հիմնահարցերի փոխարեն շոշափել են ցեմենտի, բետոնի, ներմուծման, մաքսազերծման և այլ թեմաներ»։ Դրանից ելնելով՝ Փաշինյանն ամենևին չի զարմանում, որ «հոգևորականները քաղաքականությամբ են զբաղվում»․
Մեկ այլ լրագրողի հարցին պատասխանելով՝ Նիկոլ Փաշինյանը ուղիղ հայտարարեց․ «Ամենայն հայոց կաթողիկոսն այսօր առաջնորդում է քաղաքական շարժում։ Ինչո՞ւ պիտի առաջնորդի։ Այդ շարժման նպատակը նախորդ իշխանությանը վերադարձնելն է»։
Փաշինյանի պնդմամբ՝ ներկայիս շարժման առաջնորդը Ամենայն Հայոց կաթողիկոսն է, իսկ թիվ մեկ շահառուն՝ «Հայաստան դաշինքի» ղեկավար Ռոբերտ Քոչարյանը։