Խառնակչություն. այսպես բնութագրեց ՀՀ նախագահի թեկնածու Պարույր Հայրիկյանի դեմ մահափորձը Հայաստանի Հանրապետությունում Մարդու իրավունքների առաջին պաշտպան Լարիսա Ալավերդյանը «Կենտրոն» հեռուստատեսության «Հայկական ուրբաթ» բանավեճի ժամանակ: Նա հավաստեց, որ մեր երկրում տարիներ շարունակ խմորված այս իրավիճակից ծնվում են նման երևույթներ: «Եթե Մարտի 1-ի սպանությունը կատարողները չեն հայտնաբերվել, և այդ էջը համարվում է փակված, ուրեմն նրանք անպատժելի են և մեր մեջ են: Իսկ այս անպատժելիությունը նաև խրախուսանք է: Սակայն հստակեցնենք՝ անկախ նրանից՝ ում են խփել (փառք Աստծո՝ ողջ է մնացել), անկախ նրանից, թե դա ինչպես է եղել, կա մի որոշակի միտում. մեզ ուզում են սովորեցնել, որ պարբերաբար պիտի լինեն կրակոցներ, սպանություններ, և մնան չբացահայտված»,- ասաց Ալավերդյանը:
«Ես կարծում եմ, որ ժամանակն է, որ վերջապես մեկ անգամ իրականություն դառնա իշխանությունների «ամեն ինչ պիտի անենք, որ բացահայտվի» խոստումը»,- նշեց ազգագրագետ Հրանուշ Խառատյանը՝ հիշեցնելով, որ այդ խոստումը, սկսած 1994թ. Համբարձում Գալստյանի սպանությունից, հնչել է բազմիցս, բայց մնացել չկատարված: Իր գնահատմամբ՝ նախագահության մեր թեկնածուներից մեկը «խիստ պաշտպանված է», մյուսները պաշտպանված չեն բոլորովին: Նա չի կարծում, որ Հայրիկյանի՝ մահափորձը Ռուսաստանի պատվեր որակելը հիմք ունի. «Հայրիկյանը միակը չէ, որ դեպի Եվրոպա կոչ է անում»,- փաստարկեց Խառատյանը: Այս մահափորձը, ըստ նրա, հարված էր իշխանությանը, քանի որ այս պարագայում այն չի կատարել իր «առաքելությունը»:
«Ինչ-որ հանցագործ կատարել է քստմնելի արարք: Տեղի է ունեցել քաղաքական տեռորի դրսևորում: Ձեռք է բարձրացվել անկախ պետականության խորհրդանիշներից մեկի վրա»,- ասաց «Ազատ դեմոկրատներ» կուսակցության նախագահ, Աժ պատգամավոր Ալեքսանդր Արզումանյանը: «Հայաստանն ունի ոխերիմ բարեկամներ. սա իրական բարեկամի արած չէ: Աբիժնիկի արած էլ չի. թե չէ ինչի պիտի գնար ու Հայրիկյանի վրա կրակեր. էնքան կրակելու թիրախ կա»,- ասաց նա:
«Խնդիր կա մի բան փչացնելու, հարամելու»,- նշեց Արմեն Մազմանյանը:
«Այսպիսի իրավիճակ ունենք. մարդասպանը մթության մեջ 30սմ-ից մի կրակոցը վրիպել է, մյուսը՝ ընդհանրապես չի կպել: Հետո այս շատ պրոֆեսիոնալ քիլլերը դեպքի վայրում է թողել պարկուճները և էլի բազմաթիվ հետքեր: Ովքե՞ր են, որ քիլլեր են վարձել փողոցում առաջին պատահած պատանուն»,- նշեց «Կովկաս» ինստիտուտի տնօրեն Ալեքսանդր Իսկանդարյանը:
Երևանի մամուլի ակումբի նախագահ Բորիս Նավասարդյանը հակադարձեց. «Հոկտեմբերի 27-ին գործողներն էլ պրոֆեսիոնալ չէին գործում»:
Իսկանդարյանը հույս հայտնեց, որ երբ ավարտվի այս գործը և ուժային կառույցները հրապարակեն արդյունքները, մարդիկ կկարդան ու կհավատան, ոչ թե՝ «հոկտեմբերի 27-ի գործի պես»:
«Ժառանգություն» կուսակցության քարտուղար Ստյոպա Սաֆարյանի կարծիքով՝ Հայրիկյանի դեմ մահափորձը ոչ թե հարված էր իշխանությանը, այլ ձեռնտու էր նրան, քանի որ «պետք էր հանրության ուշադրությունը շեղել վերջին օրերին մեծապես քննարկվող թեմաներից, և ձևավորել վախի մթնոլորտ, որը միայն իշխանությանն է ձեռնտու»:
Հիշեցնենք, որ երեկ (հունվարի 31) երեկոյան Երևանի Տպագրիչների 9 շենքի բակում անհայտ անձը հրազենից կրակ էր արձակել Հայրիկյանի վրա` աջ անրակի շրջանում պատճառելով հրազենային վնասվածք: Թեկնածուն տեղափոխվել էր Երևանի «Սուրբ Գրիգոր Լուսավորիչ» բժշկական կենտրոն: