ՀՀ արտգործնախարար Էդվարդ Նալբանդյանն այսօր հանդիպել է պաշտոնական այցով Հայաստանում գտնվող Ուրուգվայի ներկայացուցիչների պալատի նախագահ Խորխե Օրիկոյի հետ. տեղեկանում ենք ՀՀ արտաքին գործերի նախարարության պաշտոնական կայքից:
Ողջունելով հյուրին՝ նախարար Նալբանդյանը գոհունակությամբ նշել է, որ երկու երկրների միջև հազարավոր կիլոմետրեր են ընկած, սակայն Հայաստանը և Ուրուգվայը մոտ երկրներ են, որոնց միավորում են ամուր բարեկամությունը և նվիրվածությունը համամարդկային արժեքներին:
«Հայ ժողովուրդը ամենաջերմ զգացմունքներ է տածում Ուրուգվայի հանդեպ, որն 1965թ-ին առաջինը ճանաչեց Հայոց Ցեղասպանությունը: Այսօր էլ Դուք օտարերկրյա առաջին բարձրաստիճան պաշտոնյաներից եք, որն այցելում է Արցախ։ Մենք հատկապես ողջունում ենք Ձեր այդ քայլը, որն առանձնահատուկ գնահատականի է արժանի», – ասել է Հայաստանի արտգործնախարարը:
Ուրուգվայի Ներկայացուցիչների պալատի նախագահը շնորհակալություն է հայտնել ջերմ ընդունելության համար և շեշտել, որ Ուրուգվայը մեծապես գնահատում և կարևորում է բարեկամությունը Հայաստանի և հայ ժողովրդի հետ: Նա նշել է, որ հայերը իրենց մշակույթով, աշխատանքով և ձեռքբերումներով կարևոր ներդրում են ունեցել Ուրուգվայի զարգացման գործում:
«Մենք փոքր երկիր ենք և պաշտպանում ենք միջազգային իրավունքի սկզբունքները։ Ուրուգվայը կանի ամեն ինչ, որ պահպանի միջազգային խաղաղությունը և առաջ մղի ժողովուրդների ինքնորոշման իրավունքը», – ընդգծել է Ուրուգվայի խորհրդարանի ղեկավարը։
Զրուցակիցներն անդրադարձել են տարբեր բնագավառներում երկկողմ համագործակցության ընդլայնման նպատակով ձեռնարկվելիք քայլերին: Այս համատեքստում հատկապես կարևորվել են բարձրաստիճան փոխայցելությունները, միջխորհրդարանական համագործակցությունը, երկու երկրների միջև առկա իրավապայմանագրային դաշտի ընդլայնումը, առևտրատնտեսական կապերի խորացումը:
Նախարար Նալբանդյանը զրուցակցին ներկայացրել է արցախյան հիմնախնդրի կարգավորման ուղղությամբ Հայաստանի և միջազգային հանրության կողմից ձեռնարկվող ջանքերը։