Ղարաբաղը պատրաստ է ջուր տրամադրել Ադրբեջանին

Լեռնային Ղարաբաղի իշխանությունները պատրաստ են համագործակցել Ադրբեջանի հետ և տրամադրել ջուր. այս մասին ՍիվիլՆեթի հետ զրույցում ասաց ԼՂՀ նախագահի խոսնակ Դավիթ Բաբայանը` արձագանքելով ԵԱՀԿ Մինսկի խմբի ամերիկացի համանախագահ Ջեյմս Ուորլիքին:

Ուորլիքը Instagram-ում տեղադրել է Սարսանգի ջրամբարի լուսանկարը և կատարել հետևյալ գրառումը.

«Գիտե՞ք, թե որտեղ եմ: Ես այս լուսանկարն արել եմ անցյալ տարի համանախագահների հետ միասին: Մենք պետք է երաշխավորենք, որ ջրամբարը շարունակի Լեռնային Ղարաբաղի բնակչությանը ապահովել անվտանգ և հուսալի էներգիա: Կարևոր է նաև, որ ամբարտակն անվտանգ լինի, և ստորին հոսանքում` Ադրբեջանում գտնվողները, ջուր ունենան, երբ դա անհրաժեշտ է: Ինչո՞ւ կողմերը չեն կարող համագործակցել, երբ դա բխում է նրանց փոխադարձ շահերից: Սա երկուստեք շահավետ է, և մենք պատրաստ ենք օգնել»:

Do you know where I am? I took this photo last year with the Co-Chairs. We need to ensure that the reservoir continues to provide safe reliable power to the population of Nagorno-Karabakh. It’s also important that the dam is safe and that those downstream in Azerbaijan have water when it is needed. Why can’t the sides cooperate when it is in their mutual interest? This is a win-win and we are ready to help. #NKpeace #Armenia #Azerbaijan #Karabakh #Sarsang #Caucasus #Osce #water #Nkwar #mediation

A photo posted by ambjameswarlick (@ambjameswarlick) on Sep 10, 2015 at 6:01pm PDT

ԼՂՀ նախագահի մամուլի խոսնակը նշեց, որ այն, ինչ գրում է Ուորլիքը, Լեռնային Ղարաբաղը բազմաթիվ անգամ առաջարկել է նաև ԵԱՀԿ Մինսկի խմբի համանախագահներին, ինչպես նաև նույն Ադրբեջանին, սակայն միշտ մերժում է ստացել հենց Ադրբեջանից:

«Մենք պատրաստ ենք նաև ադրբեջանական կողմին տրամադրել ջուր, դրա մասին խոսում ենք դեռ 1998-99 թթ-ից»,- ասաց Բաբայանը` հավելելով, որ ներկա դրությամբ տնտեսական տեսնակյունից նման կարիք Լեռնային Ղարաբաղը չունի, և դա ուղղակի մարդասիրական մոտեցում կլինի` ուղղված նաև փոխվստահության մթնոլորտի ամրապնդմանը:

«Բայց հակառակ կողմը մերժում է: Ավելին` փորձում է շահարկել, ցույց տալ, որ իբրև Սարսանգի ջրամբարն անվտանգ չէ, ինչն այդպես չէ: Շահարկում են, սև փիարով են զբաղվում: Սա է խնդիրը: Մենք պատրաստ ենք փոխշահավետ համագործակցության, այսինքն` տրամադրենք ջուր, փոխարենը ինչ-որ այլ ապրանքներ վերցնենք, եթե հակառակ կողմը պատրաստ է նման համագործակցության: Եթե ոչ` ոչ: Խնդիրն իրենցն է»,- ասաց ԼՂՀ նախագահի մամուլի խոսնակը:

***

Լեռնային Ղարաբաղում գտնվող Սարսանգի ջրամբարը կառուցվել է 1970-ականներին՝ ոռոգման և էներգետիկ նպատակներով: Ջրամբարի վրա կառուցված է Սարսանգի ՀԷԿ-ը։ Ներկայում «Արցախ ՀԷԿ» ԲԲԸ-ն էլեկտրաէներգետիկ խոշոր ծրագրեր է իրականացնում դեպի Սարսանգի ջրամբար հոսող գետերի և հենց ջրամբարի վրա և շահագործում է 6 ՀԷԿ՝ ընդհանուր 73 Մվտ հզորությամբ: «Արցախ ՀԷԿ» ԲԲԸ-ի հիմնական ակտիվը Սարսանգի ՀԷԿ-ն է: Ընկերության հիմնական բաժնետերը Լեռնային Ղարաբաղի կառավարությունն է: