Գերմանիայի պաշտպանության նախարար Ուրսուլա վոն Լեյենը գերմանական լրատվամիջոցներին հայտնել է, որ Գերմանիան Թուրքիայի Ինջիրլիք ռազմակայանում տեղակայված իր զինծառայողներին կսկսի դուրս բերել հուլիսից։ Նրանք կտեղակայվեն Հորդանանում։
Ինջիրլիքում Գերմանիան ունի 250-հոգանոց զորակազմ, որը մասնակցում է «Իսլամական պետություն» ահաբեկչական խմբավորման դեմ պայքարող կոալիցիայի գործողություններին։
Ինչպես հաղորդում է Deutsche Welle-ն, Վոն Լեյենն ասել է, որ դուրսբերումը հնարավոր է՝ տևի երեք ամիս։
«Մինչև հունիսի վերջ ԻՊ-ի դեմ կոալիցիայի շրջանակում մեր թռիչքները ծրագրված են։ Դրանից հետո մենք որքան հնարավոր է արագ կտեղափոխենք մեր տանկերային ինքնաթիռները Հորդանան»,- տեղեկացրել է Վոն Լեյենը։
Գերմանիայի ՊՆ ղեկավարը նաև զգուշացրել է, որ տեղափոխմամբ պայմանավորված՝ Բունդեսվերի առաքելությունը Մերձավոր Արևելքում ժամանակավորապես կդադարեցվի։
Գերմանիայի վերոհիշյալ որոշումը պայմանավորված է Թուրքիայի հետ ունեցած լարվածությամբ։