Վարչապետի պաշտոնակատար, վարչապետի թեկնածու Նիկոլ Փաշինյանը Ազգային ժողովի հատուկ նիստում խոսեց Ալավերդու պղնձաձուլարանի մասին։
«Ոչ մեկին չի՞ անհանգստացնում, որ տասնյակ տարիներով արտանետումների ծավալները մի քանի անգամ գերազանցում են նորման»,- հայտարարեց Փաշինյանը: Նա խոսեց վիճակագրության մասին, Ալավերդիում քաղցկեղով հիվանդացության վերաբերյալ:
«Մենք ասում ենք` այդ արտադրությունը մեզ համար շատ կարևոր է, բայց չի կարելի մարդկանց թունավորելու գնով ինչ-որ խնդիր լուծել, տասնյակ հազարների թունավորելու գնով 600 մարդու խնդիր լուծել: Այդ 600 մարդու խնդիր լուծելը նաև մեր խնդիրն է: Եկեք համագործակցենք, որպեսզի էդ խնդիրները լուծվեն»,- նշեց նա:
Ավելի վաղ բնապահպանության և ընդերքի տեսչական մարմինը ստուգումներ էր անցկացրել Ալավերդու պղնձաձուլարանում և պարզել, որ գործարանի արտանետումները մինչև 15 անգամ գերազանցել են արտանետումների թույլատրելի սահմանը։
Փաշինյանը խոսեց նաև Հայաստանում հանքարդյունաբերության մասին։ Նա նշեց, որ հանքարդյունաբերությունը սոցիալական պատասխանատվության առումով պետք է ավելի պատասխանատու լինի:
«Դա հանրային հարստություն է` հանքը շահագործողի սեփականությունը չէ, որ թույլատրված ծավալներից օրինակ 20 անգամ ավել արտահանեն, 20 անգամ ավելի շատ եկամուտներ ստանան»,- ասաց նա և հարց բարձրացրեց, թե ինչու Հայաստանը չի կարող մետաղի մշակման մինչև երեք փուլ անցնել:
«Բարձր տեխնոլոգիաների կիրառումը կարող է նպաստել, որ մենք ոչ միայն ուղղակի մետաղ ձուլենք, ոչ միայն ուղղակի կաբել [մալուխ] արտադրենք, այլև այդ մետաղը օգտագործենք նաև տեխնոլոգիական արտադրանքների մեջ»,- եզրափակեց նա: