Վերջին օրերին բուռն քննարկվում է առողջապահության նախարարության ներկայացրած հայեցակարգը Հայաստանում առողջության համապարփակ ապահովագրություն ներդնելու մասին։ Ըստ այդմ՝ նախատեսվում է սահմանել առողջության հարկ՝ աշխատավարձի 6 տոկոսի չափով։ ՍիվիլՆեթը 50 էջանոց հայեցակարգից առանձնացրել է որոշ կարևոր կետեր։
Առողջության համապարփակ ապահովագրության նպատակներն են․
– ապահովել բնակչության հիմնական բժշկական օգնության և սպասարկման ծառայությունների ֆինանսական հասանելիությունը և պաշտպանվածությունը,
– բժշկական օգնության և սպասարկման ծառայությունների դիմաց կատարվող աղետալի ծախսերի կրճատումը և դրա հետևանքով աղքատացող բնակչության թվաքանակի կրճատումը,
– առողջապահության բնագավառում ծախսվող գումարների արդյունավետության և նպատակայնության մակարդակի բարձրացումը,
– բուժօգնության որակի բարելավումը
Առողջության համապարփակ ապահովագրության ներդրման նպատակներին հասնելու համար առաջարկվում է․
– կիրառել առողջության հարկ,
– պետական ծախսերի մեջ ավելացնել առողջապահությանը հատկացվող չափաբաժինը,
– սահմանել ծառայությունների փաթեթների ձևավորման հստակ սկզբունքներ բնակչության բոլոր խմբերի համար,
– ձևավորել հիմնադրամ, որը պետք է ապահովի ապահովագրության համար հավաքագրվող գումարների հաշվարկման և ծախսման արդյունավետ մեխանիզմների կիրառումը,
– բարելավել առողջապահական համակարգի կառավարումը,
– ուժեղացնել առողջության առաջնային պահպանման օղակը:
Ապահովագրական ծածկույթը կընդգրկի ամբողջ բնակչության համար սահմանված հիմնական ծառայությունների փաթեթ (ՀԾՓ), որը կտարբերվի ըստ բնակչության սեռատարիքային խմբերի առանձնահատկությունների։
ԱՀԱ օրենքով կսահմանվեն ապահովագրական փաթեթում ընդգրկվող հիմնական ծառայությունները և բնակչության խմբերը։ Հիվանդությունների և վիճակների ցանկերը, ծառայությունների շրջանակներում տրամադրվող բուժօգնության ծավալները կհաստատվեն Կառավարության կողմից՝ առողջապահության նախարարության ներկայացմամբ և Հիմնադրամի խորհրդի համաձայնությամբ:
Հաշվարկված և կանխատեսվող տարեկան ապահովագրական ծածկույթի ծախսը 1 շահառուի հաշվով կազմում է 77 274 դրամ:
Ապահովագրական ծածկույթի համար պահանջվող ծախսերի փոխհատուցումը կիրականացվի երկու հիմնական աղբյուրներից՝ պետական բյուջեի ընդհանուր եկամուտներից և առողջության հարկից:
Անկախ բնակչության որևէ խմբին պատկանելուց՝ ԱՀԱ ներդրման պահին աշխատող և ինքնազբաղված քաղաքացիները կվճարեն առողջության հարկ:
ԱՀԱ ներդրման պահին պետական բյուջեի «Պետական հիմնարկների և կազմակերպությունների աշխատակիցների բժշկական օգնության ծառայություններ» միջոցառման շահառու հանդիսացող և աշխատող քաղաքացիների համար կսահմանվի անցումային դրույթ, որի ընթացքում նախատեսված բյուջետային գումարների շրջանակներում կապահովվի առողջության հարկի սուբսիդավորում ամսական կտրվածքով՝ մեկ աշխատողի հաշվով տվյալ ծրագրում առկա գումարի չափով:
Կանխատեսվում է, որ ԱՀԱ ներդրումից հետո կշարունակվի վճարովի ծառայությունների մատուցումը, ինչպես ուղղակի բնակչությանը, այնպես էլ կամավոր ապահովագրական ընկերությունների միջոցով՝ հիմնական ծառայությունների փաթեթում չընդգրկված և չփոխհատուցվող բժշկական ծառայությունների համար։
Արտահիվանդանոցային դեղերի ապահովման համար կսահմանվի նվազագույն փաթեթի արժեք։
Դեղերի փաթեթի արժեքի հատուցումը կիրականացվի Հիմնադրամի կողմից:
ԱՀԱ ներդրման հիմնական արդյունքը հիվանդացության և մահացության ցուցանիշների բարելավումն է, առողջական խնդիրների հետևանքով հաշմանդամության դեպքերի նվազումը, ինչը կնպաստի մարդկային կապիտալի կայուն զարգացմանը և տնտեսության աճին:
Տե՛ս նաև՝ Արսեն Թորոսյանը ներկայացրել է՝ ինչպես է տեսնում բժշկական համապարփակ ապահովագրությունը
Լուսինե Վարդանյան