Հոկտեմբերի 30-ին վարչապետ Նիկոլ Փաշինյանի հրամանագրով Հայաստանի յոթ մարզերում նոր փոխմարզպետեր նշանակվեցին։ Ուշագրավ է, որ բոլոր այս փոխմարզպետները ռազմական գործիչներ են։ Սիվիլնեթն ուսումնասիրել է, թե ովքեր են նոր փոխմարզպետները։
Արարատի մարզպետի տեղակալ է նշանակվել Նորիկ Ամիրխանյանը։ Նա եղել է առաջին բանակային կորպուսի շտաբի պետը։
Արագածոտնի մարզպետի տեղակալ է նշանակվել Ռազմիկ Պետրոսյանը՝ Արցախյան առաջին պատերազմում «Ապարան» ջոկատի հրամանատարը։ Նա հետագայում զբաղեցրել է նաև Ապարանի քաղաքապետի պաշտոնը։ Սեպտեմբերի 27-ին Արցախի վրա ադրբեջանական ագրեսիայից հետո Պետրոսյանը մեկնել էր Արցախ։
Գեղարքունիքի փոխմարզպետ նշանակվել է Հենրիկ Մուրադյանը՝ Հայաստանի զինվորական նախկին կոմիսարը։ Նա ունի գեներալ-մայորի զինվորական կոչում, ՊՆ-ում զբաղեցրել է հրամանատարական այլ պաշտոններ ևս։ Մուրադյանը արցախյան առաջին պատերազմում կազմավորել ու մասնակցել է Վարդենիսի հայկական բնակավայրերի պաշտպանությունը։
Տավուշի փոխմարզպետ է նշանակվել Արթուր Հովակիմյանը։ Նա գնդապետ է և երկար տարիներ Իջևանի զինվորական կոմիսարն էր։
Սյունիքի փոխմարզպետ նշանակվել է Մելիքսեթ Պողոսյանը։ Նա Գորիսի զինվորական կոմիսարն է եղել, զինվորական կոչմամբ՝ գնդապետ։ Արցախյան առաջին պատերազմում Պողոսյանը եղել է «Մելիք Բարխուդար» ջոկատի հրամանատարը։
Գեներալ-մայոր Ալեքսան Ալեքսանյանը նշանակվել է Արմավիրի մարզպետի տեղակալ։ Ալեքսանյանը երկար ժամանակ ՊՆ-ում բարձր պաշտոններ է զբաղեցրել։ Եղել է ԶՈՒ անձնակազմի հետ տարվող աշխատանքների վարչության պետ, ապա ԶՈՒ բարոյահոգեբանական ապահովման վարչության պետ։
Վայոց ձորում փոխմարզպետ նշանակվել է Արայիկ Մուրադյանը (Մախնո): Վերջինս զբաղեցրել է Արարատի զինվորական կոմիսարի պաշտոնը։ Գնդապետ է։ Առաջին պատերազմում Մուրադյանը մասնակցել է Գորիսի, Վայքի, Սիսիանի սահմանների պաշտպանությանը։
Նոր փոխմարզպետների նշանակումը տեղավորվում է Հայաստանում աշխարհազորի ձևավորման օրենսդրության և նպատակների տրամաբանության մեջ։ Ըստ այդմ՝ յուրաքանչյուր մարզում ձևավորվող աշխարհազորային զորամիավորման հրամանատար պետք է դառնա փոխմարզպետը, իսկ Երևանում՝ փոխքաղաքապետը։
Փոխմարզպետներ դեռ չեն նշանակվել Լոռիի, Շիրակի, Կոտայքի մարզերում, իսկ Երևանի ավագանին նոր փոխքաղաքապետի նշանակման վերաբերյալ ավագանու նիստ դեռ չի հրավիրել։
Մկրտիչ Կարապետյան
