ՀՀ կենտրոնական ընտրական հանձնաժողովի նախագահ Տիգրան Մուկուչյանը պարզաբանել է, թե ինչ կլինի, եթե նոր խորհրդարան անցնող երկու ընդդիմադիր ուժերը, օրինակ, հրաժարվեն իրենց մանդատներից:
«Այս փուլում մանդատների հրաժարման ինստիտուտ, որպես այդպիսին, ամրագրված չունենք: Իհարկե, կարող է լինել տարբերակ, որ ենթադրենք, թեկնածուները, որոնց հատկացվում են մանդատներ, հրաժարվում են մանդատներից՝ ինքնաբացարկ հայտնելու միջոցով»,- «Արմենպրեսի» հաղորդմամբ՝ ասել է Մուկուչյանը:
Նա նշել է, որ մանդատները բաշխվում են բացառապես այն կուսակցությունների միջև, որոնք Ընտրական օրենսգրքով սահմանված կարգով պետք է ստանան այդ մանդատները, նրանց փոխարեն այլ ուժի այդ մանդատները փոխանցվել չեն կարող: Հարցին՝ եթե համամասնական ցուցակի բոլոր անդամները հրաժարվեն, ի՞նչ կլինի՝ Մուկուչյանն ասել է՝ կնշանակի, որ ոչ ոք մանդատ չի ստանա, խորհրդարանում կմնան այն ուժերը, որոնք կան: Հարցին, թե արդյոք օրենքի բաց կա՞ այստեղ՝ նա դժվարացավ պատասխանել՝ հավելելով, որ խնդիրն առանձին վերցրած չեն ուսումնասիրել: Նա դժվարացավ հստակ վերջնական պատասխան ներկայացնել, թե արդյոք այդ դեպքում կարող են լինել նոր ընտրություններ:
Մուկուչյանը հիշեցրել է, որ ԿԸՀ-ի գործառույթներն ավարտվում են արդյունքների ամփոփմամբ, ընտրության արդյունքների վերաբերյալ որոշման ընդունմամբ և մանդատների տրամադրմամբ:
Անդրադառնալով ընտրությունների օրը հոսանքազրկման դեպքերին՝ Մուկուչյանը վստահեցրել է, որ փորձել են համապատասխան ծառայությունների միջոցով առավելագույնը կարճ ժամկետում վերականգնել: Նա հիշեցրել է, որ այդ կապակցությամբ տվել են պարզաբանումներ, որ տեխնիկական սարքավորումների աշխատանքի հետ կապված խափանումներ չեն եղել: «Կային համապատասխան մարտկոցներ, որոնք հնարավորություն էին տալիս նույնիսկ հոսանքազրկման պարագայում շարունակել աշխատանքը, քվեարկության ընթացքը նկատի ունեմ: Խնդիր էր լինում տեսախցիկների հետ կապված, որոնք անջատվում էին, բայց հոսանքը վերականգնելու պարագայում դրանք անմիջապես վերականգնվում էին»,-ասել է նա:
Հարցին, թե ինքն այդ հոսանքազրկումներն արդյոք պատահականությո՞ւն է համարում՝ Մուկուչյանն ասել է, որ նման դատողություն անելու համար պետք է ունենալ լուրջ հիմքեր:
