Վրացի միլիարդատեր, Վրաստանի իշխող «Վրացական երազանք» կուսակցության հիմնադիր Բիձինա Իվանիշվիլին շվեյցարական Credit Suisse բանկի հետ նոր դատական վեճի մեջ է։ Վրաստանում պնդում են, որ Արևմուտքը Իվանիշվիլիի վրա ճնշում է գործադրում երկիրը ուկրաինական պատերազմի մեջ ներքաշելու համար։ OC Media-ի անդրադարձը։
Վրաստանի իշխող կուսակցության առաջնորդները պաշտպանել են կուսակցության հիմնադիր Բիձինա Իվանիշվիլիին շվեյցարական Credit Suisse բանկի հետ նոր դատական վեճում՝ պնդելով, որ Իվանիշվիլիի վրա ենթադրյալ ճնշումը կարող է լինել միջազգային դավադրության մի մասը՝ Վրաստանին ուկրաինական պատերազմի մեջ ներքաշելու համար:
Ուրբաթ Իվանիշվիլիի վարձած Cision PR ընկերությունը հայտնել է, որ Վրաստանի նախկին վարչապետը դատական հայց է ներկայացնում Credit Suisse-ի դեմ՝ իրեն պատկանող թրաստ ֆոնդից միջոցները ստանալ չկարողանալու համար: Այս գործը կապ չունի Credit Suisse-ի դեմ դատական մեկ այլ գործընթացի հետ, որը Իվանիշվիլին շահել էր մարտին։
Ըստ Cision-ի՝ Credit Suisse-ը «անհիմն տեղեկատվություն է պահանջել», ինչը հանգեցրել է թրաստ ֆոնդից միջոցների ստացման մեկ ամսով հետաձգման։ Բացի այդ, դրամական միջոցների մեկ այլ դիմում դեռ առկախված է:
Cision-ի ներկայացուցիչներն ասել են, որ շվեյցարական բանկը վկայակոչել է «Արևելյան Եվրոպայում աշխարհաքաղաքական միջավայրը»: Ընկերությունմ պնդել են, որ Իվանիշվիլին որևէ կապ չունի Ուկրաինա ռուսական ներխուժման հետ և ենթակա չէ որևէ պատժամիջոցների:
«Վրացական երազանքի» նախագահ Իրակլի Կոբախիձեն ենթադրել է, որ դրամական փոխանցումների հետաձգումը կարող է լինել «համակարգված գործողությունների» արդյունք, որի նպատակն է Վրաստանին ներքաշել ուկրաինական պատերազմին մեջ։
Կոբախիձեն իր ենթադրությունը հիմնավորելու համար մեջբերել է վերջերս եղած մի շարք իրադարձություններ, այդ թվում՝ Վրաստանում Ուկրաինայի դեսպանի հետկանչը, ինչպես նաև Իվանիշվիլիի ձայնագրության հրապարակումը, որտեղ նա խոսում է պատժամիջոցների տակ գտնվող ռուս գործարար Վլադիմիր Եվտուշենկովի հետ:
«Երբ դրան գումարվում է շվեյցարական բանկը, դա, իհարկե, հավելյալ հարցեր է առաջացնում»,- ասել է Կոբախիձեն:
«Եթե ինչ-որ մեկը փորձում է Բիձինա Իվանիշվիլիին վերադարձնել վրացական քաղաքականություն իր կամքին հակառակ, որպեսզի երկիրը ներքաշվի պատերազմի մեջ․․․ ես դա համարում եմ առնվազն անընդունելի և սկզբունքորեն սխալ»։
«Վրացական երազանք»-ի պատգամավորներ Սոզար Սուբարին և Իրակլի Քադագիշվիլին նույնպես արձագանքել են այս վարկածին՝ ենթադրելով, որ Իվանիշվիլիի նկատմամբ կարող է լինել քաղաքական ճնշում կամ շանտաժ երկիրը պատերազմի մեջ ներքաշելու համար:
Թեև «Վրացական երազանքի» առաջնորդները ձեռնպահ են մնում բացահայտ նշելու, թե իրենց կարծիքով ով է կանգնած դավադրության հետևում, իսկ Կոբախիձեն վկայակոչում է իր «քաղաքական պատասխանատվությունը» նման բան չանելու համար, կառավարամետ «Իմեդի» հեռուստաընկերությունը մատնացույց է անում Արևմուտքին:
«Հասարակության մի մասի կարծիքով՝ կա հստակ համակարգված գործողություն և սխեմա, որի հետևում կանգնած է Արևմուտքը»,- ասել է «Իմեդի»-ի հաղորդավար Լևան Ջավախիշվիլին՝ ներկայացնելով մի հատված այս պատմությունից։
Հաղորդման այդ հատվածում հարցազրույցներ են ներկայացվում մի քանի մարդկանց հետ, որոնք պնդում են, թե Միացյալ Նահանգները փորձում է ճնշում գործադրել Իվանիշվիլիի վրա՝ Վրաստանին ներքաշելու ուկրաինական պատերազմում ընդդեմ Ռուսաստանի:
«ԱՄՆ-ում կա մի ուժ, որը ցանկանում է, որ մենք ներգրավվենք այս հակամարտության մեջ […] Նպատակը Ռուսաստանին որպես համաշխարհային ագրեսոր ներկայացնելն է»,- ասել է բանասեր Զազա Շատիրիշվիլին։
Երեքշաբթի Վրաստանի խորհրդարանի արտաքին հարաբերությունների հանձնաժողովի փոխնախագահ Գիորգի Խելաշվիլին փորձել է հետ կանգնել իր գործընկերների որոշ հայտարարություններից՝ պնդելով, թե «խոսքը, իհարկե, մեր ռազմավարական գործընկերների մասին չէ»՝ նկատի ունենալով արևմտյան երկրներին։
Իվանիշվիլին պաշտոնապես լքել է քաղաքականությունը 2021-ի հունվարին՝ թողնելով «Վրացական երազանք»-ի ղեկավարի պաշտոնը։ Հարցին, թե ինչու երրորդ կողմերը պետք է ճնշեն Իվանիշվիլիին, որ նա ազդի կառավարության քաղաքականության վրա՝ հաշվի առնելով քաղաքականությունից նրա ակնհայտ հեռանալը, կուսակցությունում չեն պատասխանել։