Ամէն ինչ սկսած էր շատ խիզախ որոշումով մը եւ երբ «ՏուրՏէ» հարթակի գործիչներ յայտարարած էին թէ 24 Ապրիլի երեկոյեան ժամը ճիշդ 19.15-ին Թաքսիմի հրապարակին վրայ պիտի յիշատակուի Հայոց ցեղասպանութեան զոհերը, շատերու համար դժուար էր հաւատալ այս յայտարարութեան իրականացման։ Օրը հասաւ եւ իրաւ ալ մօտ 500 անձեր մէկտեղուեցան հրապարակի մէկ անկիւնը, ու արտասանուեցաւ մամլոյ յայտարարութիւն մը եւ ներկաները հրաւիրուեցան զոհերու յիշատակին յոտնկայս լռութիւն պահելու։ Միջոցառումը կրկնուեցաւ յաջորդող տարիներուն ալ իւրաքանչիւր անգամ գերազանցելով մասնակցողներու քանակը։ 100-ամեակին մասնակիցներու թիւը այլեւս կը հասնէր բազմահազարներու եւ հաւաքման վայրն ալ փոխադրուած էր 50 մեթր աւելի ներքեւ, դէպի ֆրանսական հիւպատոսարանի մուտքը։
Այս ընթացքը խափանեցաւ նախ համավարակի սահմանափակումներով եւ անցեալ տարի ալ ոստիկանութեան անվտանգութեան մտահոգութիւններով։
«ՏուրՏէ» հարթակը այս տարի դարձեալ դիմած է Իսթանպուլի Կուսակալութեան, միջոցառումը Գատըգիւղի մէջ կայացնելու համար։ Միւս կողմէ Մարդու Իրաւունքներու Միութիւնն ալ իր կարգին պատրաստութիւններ կը տեսնէ յիշատակման երկրորդ միջոցառումի մը համար, որուն վայրն է Սուլթանահմետի Իսլամական Արուեստի Թանգարանի մուտքը։
Պահի դրութեամբ չէ յստակացած Կուսակալութեան դիրքորոշումը։