ՄԱԿ-ի առաքելության պատրաստած զեկույցին անհրաժեշտ է պատասխանել հակազեկույցով, կարծում է Սիրիայում ՄԱԿ-ի Զարգացման ծրագրի (UNDP) նախկին ղեկավար Դավիթ Հակոբյանը։
Նա ասում է, որ Լեռնային Ղարաբաղ այցելությունը տեղի է ունեցել ՄԱԿ-ի ընթացակարգին համապատասխան․ առաքելությունը պետք է այցելեր և տեղում ծանոթանար իրականությանը, բայց 10 օր հետո են եկել, երբ հայ չկա Արցախում։
«Ընդհանուր առմամբ, գրված է իրականությունից կտրված, զգույշ ձևակերպումներով զեկույց, օրինակ, «մեզ ասել են՝ 50-1000 էթնիկ հայ է մնացել»։ Նախ, սա շատ լայն միջակայք է, երկրորդ, չեն ասում՝ որ իրենք են հաշվել։ Ասում են՝ վնասված հիվանդանոց կամ դպրոց չկա, բայց երևի նրանց տարել են ընտրված հիվանդանոցներ և դպրոցներ։ Առաքելությունը նաև գյուղեր չի այցելել, իսկ դա կարևոր էր մարդկության դեմ հանցագործությունները արձանագրելու տեսանկյունից»,- ասում է Հակոբյանը։
ՄԱԿ-ի նախկին աշխատակաիցը կարծում է, որ այժմ կարևոր է՝ Հայաստանում ՄԱԿ-ի գրասենյակի ներկայացուցիչները իրենց կարծիքն արտահայտեն նրա մասին, թե ինչպես և ինչու է Արցախի հայ բնակչությունը եկել Հայաստան։ Նա համոզված է, որ ԱԳՆ-ն մեծ աշխատանք ունի անելու, որպեսզի տեղի ունեցածի մեր նարատիվը կարողանանք տեղ հասցնել։
Հոկտեմբերի 2-ին հրապարակվել է ՄԱԿ-ի զեկույցը, ըստ որի՝ Արցախում կարող է մնացած լինել 50-1000 էթնիկ հայ։ ՄԱԿ-ի ներկայացուցիչները, որոնք այցելել են Ստեփանակերտ, չեն արձանագրել «հիվանդանոցների, դպրոցների, տների, մշակութային ու կրոնական կառույցների վնաս» և նշել են, որ «Ադրբեջանը պատրաստվում է վերականգնել առողջապահական և այլ ենթակառուցվածքներ»։
Առաքելության անդամները «ոչ տեղացիներից և ոչ մյուսներից հրադադարից հետո քաղաքացիների նկատմամբ բռնության դեպքերի մասին չեն լսել»։
Հայաստանի հատուկ հանձնարարություններով դեսպան Էդմոն Մարուքյանը քննադատել է ՄԱԿ-ի առաքելության աշխատանքը՝ շեշտելով, որ առաքելությունն օրինականացրել է Ադրբեջանի կողմից իրականացված հանցագործությունները։
«Լեռնային Ղարաբաղում, այսպես կոչված, ՄԱԿ-ի առաքելությունն արեց հնարավոր ամեն բան՝ օրինականացնելու Ադրբեջանի կողմից իրականացված էթնիկ զտումները, կամայական ձերբակալությունները, քաղաքացիական ենթակառուցվածքների ոչնչացումը և այլ հանցագործությունները։ Այս մարդիկ վարկաբեկում են ՄԱԿ-ը՝ որպես ինստիտուտ։ Ես անհամբերությամբ սպասում եմ այդ «ներկայացուցիչների» գործունեության վերաբերյալ ՄԱԿ-ի հետաքննությանը», – գրել է նա։
The so called UN mission in Nagorno Karabagh did their best to legitimize the ethnic cleansing, arbitrary detentions, destructions of the civilian infrastructure and other crimes committed by Azerbaijan. These guys are discrediting the UN as an institution. I look forward to the…
— Edmon Marukyan (@edmarukyan) October 3, 2023
Ստելլա Մեհրաբեկյան
