2023 թվականին լրատվական դաշտը, սոցցանցերն ու համացանցը ողողվեցին սխալ, իրականությանը չհամապատասխանող և մոլորեցնող լուրերով ու հայտարարություններով։ Իշխանությունները, ընդդիմությունը, տարբեր քաղաքական և հանրային գործիչներ, լրատվամիջոցներ ու սոցցանցային «գործիչներ» տարվա ընթացքում հնչեցրին դիտավորյալ և ոչ դիտավորյալ պնդումներ և հայտարարություններ, որոնք աղավաղում էին իրականությունը և ազդեցություն ունենում հանրային կարծիքի վրա։
ՍիվիլՆեթի փաստերի ստուգման թիմը՝ #CivilNetCheck-ը, իր ընթերցողներին այս տարի էլ առաջարկում է միասին որոշել, թե որն է 2023-ի տարվա սուտը։
Ըստ Ձեզ՝ ո՞րն է 2023-ի ամենամեծ սուտը
Ընտրեք մեր ներկայացրած տարբերակներից մեկը կամ առաջարկեք ձեր տարբերակը։
- Կառավարությունը հանձնառու է ապահովել ԼՂ ժողովրդի անվտանգությունն ու Ղարաբաղյան հիմնախնդրի խաղաղ կարգավորումը
2021-ի օգոստոսին ՀՀ կառավարության ընդունած՝ 2021-2026թթ. ծրագրում ամրագրված էր՝ առաջիկա տարիներին կառավարության գլխավոր խնդիրը պետք է լինի ԼՂ ժողովրդի անվտանգության ապահովումն ու Ղարաբաղյան հիմնախնդրի խաղաղ և համապարփակ կարգավորումը։ Մինչդեռ, ՀՀ կառավարությունն ու իշխանությունները չկարողացան լուծել այս խնդիրը. Արցախը 2023-ի սեպտեմբերին հարձակման ենթարկվեց Ադրբեջանի կողմից, զոհվեցին ու վիրավորվեցին հարյուրավոր մարդիկ, Արցախն ամբողջությամբ հայաթափվեց, և ՀՀ կառավարությունը Ղարաբաղյան հիմնախնդրի լուծման հարց փաստացի այլևս չի դիտարկում՝ Արցախը ճանաչելով Ադրբեջանի կազմում։
- Ռուս խաղաղապահներն ապահովում են արցախցիների անվտանգությունը
Ռուս խաղաղապահների՝ Լեռնային Ղարաբաղում հաստատավելն ու առաքելության տեղակայումը անվտանգության որոշակի երաշխիք էր դիտվում Ադրբեջանի հարձակումներից և լայնածավալ պատերազմից։ ՀՀ ընդդիմությունը Արցախի էթնիկ զտումից օրեր առաջ հայտարարում էր, թե Ռուսաստանը Արցախի հզոր դաշնակիցն է։ Ռուս խաղաղապահները, մինչդեռ, ի հեճուկս նոյեմբերի 9-ի համաձայնագրով իրենց ստանձնած պարտավորությունների, որևէ գործողություն չձեռնարկեցին Արցախն ադրբեջանական ագրեսիայից պաշտպանելու և էթնիկ զտում թույլ չտալու համար։
- Ֆրանսիայի կողմից Հայաստանին տրամադրված «Բաստիոն» զրահամեքենաները թույլ պաշտպանված են
Երբ հայտնի դարձավ, որ Ֆրանսիան Հայաստանին է փոխանցում ավելի քան 20 «Բաստիոն» զրահամեքենա, լուրեր տարածվեցին, թե դրանք թույլ պաշտպանված են, և անգամ պատերազմի մեջ գտնվող Ուկրաինան է հրաժարվել դրանցից։ ՌԴ ԱԳՆ ներկայացուցիչ Մարիա Զախարովան նույնիսկ հայտարարեց, թե «Բաստիոնները» Ուկրաինայում ցույց են տվել բավական ցածր արդյունավետություն՝ իրական մարտական պայմաններում։ Մինչդեռ, Ուկրաինան այս զրահամեքենաներից չի հրաժարվել, դրանք ռուս-ուկրաինական պատերազմում չեն օգտագործվել, որպեսզի ցույց տային իրենց անարդյունավետությունը։ Թույլ պաշտպանված լինելու մասին տեղեկություններն էլ անհիմն են։
