«Ադրբեջանի և Հայաստանի միջև արդեն դե-ֆակտո խաղաղություն է, երկու երկրների սահմանին մի քանի ամիս է ինչ հանգիստ է»: Այդ մասին փետրվարի 1-ին հայտարարել է Ադրբեջանի նախագահ Իլհամ Ալիևը՝ միջխորհրդարանական դաշինքի գլխավոր քարտուղար Մարտին Չունքոնքուի հետ հանդիպմանը։
Ալիևը շեշտել է, որ գործընթացը տրամաբանական ավարտին հասցնելու համար պետք է կնքվի խախաղության պայմանագիր։
Նրա կարծիքով՝ խաղաղության հասնելու համար Հայաստանը պետք է փոփոխություններ կատարի Սահմանադրության մեջ և այլ իրավական փաստաթղթերում։ Նա դրական է համարել թեմայի շուրջ Հայաստանում ծավալվող քննարկումները։
«Հայաստանի իրավական փաստաթղթերում Ադրբեջանի դեմ տարածքային պահանջներ են առկա։ Բազմաթիվ վերապահումներ կան, որոնք չեն ճանաչում Ղարաբաղի նկատմամբ Ադրբեջանի ինքնիշխանությունը»,- ասել է Ալիևը։
***
Հունվարի 18-ին վարչապետ Նիկոլ Փաշինյանը հայտարարել է, որ Հայաստանը կարիք ունի նոր Սահմանադրության, ոչ թե սահմանադրական փոփոխությունների։ Փաշինյանի կարծիքով՝ Հայաստանը պետք է ունենա Սահմանադրություն, որը «կասկածի տեղիք չտվող քվեարկության արդյունքներով» ընդունվել է ՀՀ ժողովրդի կողմից․ «Մենք պետք է ունենանք Սահմանադրություն, որը Հայաստանի Հանրապետությունն ավելի մրցունակ և ավելի կենսունակ է դարձնում աշխարհաքաղաքական և ռեգիոնալ նոր պայմաններում»,- նշել է նա։
Արտգործնախարար Արարատ Միրզոյանը հունվարի 23-ի ասուլիսի ժամանակ խոստովանել է, որ Ադրբեջանը խնդիրներ տեսել է Հայաստանի սահմանադրությունում․ «Երկու կողմն էլ (Հայաստանը և Ադրբեջանը – խմբ․) իրավական խնդիրներ տեսել են այս առումով, այդ խնդիրները ներկայացրել են միմյանց և երկու կողմն էլ տվել են համապատասխան պարզաբանումներ։ Այո, որքան որ Ադրբեջանն է այդ խնդիրը տեսել և ներկայացրել, նույնքան էլ Հայաստանն է Ադրբեջանի ուշադրությունը հրավիրել համարժեք այդպիսի խնդրի՝ սկսած իրենց Սահմանադրությունից»,- ասել է նա։
Հայաստանի ընդդիմությունը համոզված է, որ իշխանությունը մտադիր է Սահմանադրությունից հանել Անկախության հռչակագրին հղումը, որում նշվում է Հայաստանի և Լեռնային Ղարաբաղի վերամիավորման մասին։
