Անի Գրիգորյան, #CivilNetCheck
Պարզաբանում
Արտակ Հովհաննիսյանը մարտի 6-ին այցելել է Քանաքեռ-Զեյթուն բուժկենտրոն, որտեղ պարզել է, որ որդու՝ հրետանավոր Ալբերտ Հովհաննիսյանի անունով վահանակն ամրացվել է Պլաստիկ վերականգնողական և Միկրովիրաբուժության բաժանմունքի պատին մարտի 5-ի առավոտյան՝ փաստացի իր բարձրացրած աղմուկից հետո։
Փաստացի բաժանմունքի՝ այլ հարկ տեղափոխումից հետո ցուցանակը չէր փակցվել։ «Մեզ նոր տնօրենն ասաց, որ թյուրիմացություն է եղել, իրավիճակին չի տիրապետել այն ժամանակ, չի իմացել, որ անվանակոչված բաժանմունք է»,- լրագրողներին հայտնել են ծնողները։
Հովհաննիսյանները որդու նկարով վահանակը տեղափոխել և փակցրել են նախկին տեղում և ժամանակ են տվել բուժկենտրոնին, որպեսզի բաժանմունքն էլ վերադառնա նախկին հարկ։
——
Լրատվամիջոցներում մարտի 5-ին տարածվել է տեղեկություն, թե Քանաքեռ-Զեյթուն բուժկենտրոնի պատից հանել են հրետանավոր Ալբերտ Հովհաննիսյանի նկարով վահանակը։ Տեղեկության աղբյուրը Ալբերտ Հովհաննիսյանի հոր՝ Արտակ Հովհաննիսյանի ֆեյսբուքյան գրառումն է, որում նա ահազանգել է, որ այցելել է բուժկենտրոնի Պլաստիկ վերականգնողական և Միկրովիրաբուժության բաժանմունք, որն անվանակոչվել էր որդու անունով, սակայն տվյալ հարկում բացակայել է բաժանմունքը՝ հերոսի վահանակի հետ միասին։
Հովհաննիսյանը փորձել է աշխատակիցներից ճշտել է, թե ուր է տեղափոխվել բաժանմունքը՝ վահանակի հետ, սակայն չի հաջողվել։
Այս տեղեկությունը՝ մոլորեցնող վերնագրերով տարածել են Sputnik Armenia, news.am, Tert.am, 7or.am և այլ լրատվականներ, որոնք չեն կապվել ԲԿ-ի հետ՝ տեղեկությունը ճշտելու համար։
ՍիվիլՆեթի փաստերի ստուգման թիմը՝ #CivilNetCheck-ը, խոսեց Պլաստիկ վերականգնողական և միկրովիրաբուժության բաժանմունքի վարիչ Վահան Քոչարյանի հետ։ Վերջինս պարզաբանեց, որ իր ղեկավարած բաժանմունքը տեղափոխվել է շենքի երկրորդ հարկ, որտեղ էլ ներկայում փակցված է Ալբերտ Հովհաննիսյանի անվանբ և նկարով վահանակը։ Նա տրամադրեց նաև լուսանկար։
Քոչարյանը պարզաբանեց, որ բաժանմունքի՝ նախկինում զբաղեցրած հարկում այլ բաժանմունք է տեղակայվել, և իրենք, տեղափոխվելով նոր տարածք, իրենց հետ են վերցրել վահանակը։
Քանաքեռ-Զեյթուն ԲԿ-ի (նաև Երևան բժշկագիտական կենտրոն) Պլաստիկ վերականգնողական և Միկրովիրաբուժության բաժանմունքն անվակակոչվել էր Ալբերտ Հովհաննիսյանի անունով 2021-ի փետրվարին։
