ՀՀ փոխվարչապետ, տարածքային կառավարման նախարար Արմեն Գևորգյանի մոտ այսօր կայացած խորհրդակցության ընթացքում քննարկվել են ոռոգման շրջանի ավարտի հետ կապված եւ ընթացիկ այլ հարցեր. տեղեկացրնում են ՀՀ ՏԿՆ հասարակայնության հետ կապերի բաժնից: Խորհրդակցությանը մասնակցում էին ՀՀ գյուղատնտեսության նախարար Սերգո Կարապետյանը, Արարատի և Արմավիրի մարզպետները, ՏԿՆ ջրային տնտեսության պետական կոմիտեի նախագահը, Արարատյան դաշտավայրի ՋՕԸ-երի ղեկավարներ, այլ պատասխանատուներ:
Մասնավորապես անդրադարձ է եղել մատակարարված ոռոգման ջրի դիմաց վարձավճարների գանձման ընթացքին: Տեղեկացվել է, որ այս տարի մատակարարված ջրի դիմաց հասույթը կազմել է Դ5.285 մլրդ՝ նախորդ տարվա համեմատ Դ800 մլն-ով ավելի: Նոյեմբերի 11-ի դրությամբ գանձվել է Դ3.354 մլրդ կամ ձևավորված հասույթի 63,5 տոկոսը: Նախորդ տարվա նույն ժամանակահատվածի համեմատ հավաքագրման ծավալն ավելի է Դ114 մլն-ով: Չնայած բացարձակ գումարային արտահայտությամբ հավաքագրումների աճին՝ փոխվարչապետն անբավարար է համարել տեմպերը և համակարգի արդյունավետ ու անխափան աշխատանքի տեսանկյունից կարևորել տարին առանց պարտքերի փակելու հանգամանքը: Նա պատասխանատուներին հորդորել է հետևողական աշխատանք իրականացնել գյուղացիական տնտեսությունների հետ՝ գանձումները ողջ ծավալով ապահվելու ուղղությամբ:
Խորհրդակցության ընթացքում քննարկվել է նաև մթերող կազմակերպությունների կողմից մթերված բերքի դիմաց գյուղացիական տնտեսությունների նկատմամբ ֆինանսական պարտավորությունների իրականացմանը վերաբերող հարցեր: Գյուղատնտեսության նախարարը տեղեկացրել է, որ ամբողջությամբ գույքագրվել են նմանատիպ խնդիրները, և հետևողական քայլեր են ձեռնարկվում, որպեսզի մինչև նոյեմբերի 30-ը ընկերությունները կատարեն ստանձնած պարտավորությունները: Ըստ փոխվարչապետի՝ դա լրացուցիչ հնարավորություն կստեղծի, որպեսզի գյուղացիական տնտեսությունները կարողանան կատարել թե ստացած ոռոգման ջրի դիմաց վճարումները, թե տեղական հարկերի մասով իրենց պարտավորությունները:
