Հայաստանի պաշտպանության նախարարությունը հայտնում է, որ հայ-ադրբեջանական սահմանի Երասխի հատվածում հակառակորդը կրկին կրակ է բացել հայկական դիրքերի ուղղությամբ։
«Հուլիսի 19-ի երեկոյան ադրբեջանական զինված ուժերը հերթական անգամ սադրիչ գործողությունների են դիմել: Մասնավորապես, ժամը 18:40-ից սկսած, ադրբեջանական ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի Երասխի հատվածում տեղակայված հայկական դիրքերի ուղղությամբ, ինչի արդյունքում ծավալվել է ինտենսիվ փոխհրաձգություն»,- ասվում է հաղորդագրությունը։
Նախարարությունից տեղեկացնում են, որ հայկական կողմից զոհեր և վիրավորներ չկան:
«ՀՀ պաշտպանության նախարարությունը խստիվ դատապարտում է ադրբեջանական կողմի հերթական սադրանքը և նախազգուշացնում, որ ցանկացած նման գործողություն արժանանալու է հայկական կողմի կոշտ արձագանքին: Իրադրության սրման ողջ պատասխանատվությունն ընկնում է Ադրբեջանի ռազմաքաղաքական ղեկավարության վրա»,- նշված է հաղորդագրության մեջ։
***
Հայ-ադրբեջանական սահմանի Երասխի հատվածում իրավիճակը լարվել է հուլիսի 14-ից, հակառակորդը վերջին օրերին պարբերաբար կրակ է բացում հայկական դիրքերի ուղղությամբ։ Հուլիսի 14-ին տեղի ունեցած փոխհրաձգության հետևանքով մահացու հրազենային վիրավորում էր ստացել Հայաստանի զինված ուժերի պայմանագրային զինծառայող, շարքային Սամվել Գագիկի Ալավերդյանը: