Երևանի քաղաքապետարանի «Երևանյան ամառ» բազմաբնույթ ծրագիրը ներառում է նաև անվճար բուժօգնության ակցիա, որով բուժսպասարկման 3 ուղղություններ են առաջարկվում՝շ` սիրտ-անոթային հիվանդություններ (հետազոտություն, մասնագիտական խորհրդատվություն), գինեկոլոգիական հիվանդություններ (հետազոտություն, վիրահատություն), վահանաձև գեղձի հիվանդությունների վաղ հայտնաբերում ՈՒՁՀ-ի միջոցով։
Ինչպես հաղորդում են քաղաքապետարանի մամուլի ծառայությունից, «Երևանյան ամառ» մեկամսյա ծրագրի առաջին 6 օրերին Երևանի քաղաքապետարանի ենթակայության առողջապահական հաստատություններ է դիմել 494 քաղաքացի, նրանցից 15-ը ուղեգրվել է գինեկոլոգիական վիրահատության, 92-ը՝ վահանաձև գեղձի, 18-ը՝ սիրտ-անոթային հետազոտությունների։
«Երևանյան ամառ» ծրագրի առողջապահական ակցիան առավել լիարժեք անցկացնելու նպատակով՝ քաղաքապետ Տարոն Մարգարյանի հանձնարարությամբ, ակցիայում ներառված 3 ուղղություներով հետազոտված/բուժզննված հիվանդները, ըստ անհրաժեշտության, Երևանի քաղաքապետարանի առողջապահության վարչության կողմից սահմանված կարգով կուղեգրվեն անհրաժեշտ լրացուցիչ հետազոտությունների և ստացիոնար բուժման:
Ակցիայից օգտվելու համար պետք է սպասարկող համաբուժարան (պոլիկլինիկա) ներկայանալ անձնագրով, դիմել համաբուժարանի տեղամասային թերապևտին կամ ընտանեկան բժշկին։
