Ռուսաստանի նախագահ Վլադիմիր Պուտինը երկրորդ տարին անընդմեջ գլխավորել է Forbes-ի Աշխարհի ամենաազդեցիկ մարդկանց ամենամյա ցուցակը:
Ամերիկյան ազդեցիկ հանդեսի վարկանիշի երկրորդ հորիզոնականում այս տարի ևս ԱՄՆ-ի նախագահ Բարաք Օբաման է, երրորդում` Չինաստանի նախագահ Սի Ցզինպինը:
2012թ. Պուտինը այս վարկանիշում զբաղեցրել էր երրորդ տեղը. առաջին և երկրորդ հորիզոնականներն այդ ժամանակ զբաղեցրել էին Բարաք Օբաման ու Գերմանիայի դաշնային կանցլեր Անգելա Մերկելը համապատասխանաբար:
Forbes-ի 2014թ. Աշխարհի ամենաազդեցիկ մարդկանց ցուցակի թոփ 10-ն ունի հետևյալ տեսքը`
- Վլադիմիր Պուտին (Ռուսաստանի նախագահ),
- Բարաք Օբամա (ԱՄՆ-ի նախագահ),
- Սի Ցզինպին (Չինաստանի նախագահ),
- Ֆրանցիսկ (Հռոմի պապ),
- Անգելա Մերկել (Գերմանիայի կանցլեր),
- Ջանեթ Յելեն (ԱՄՆ-ի Ֆեդերալ պահուստային համակարգի փոխնախագահ),
- Բիլ Գեյթս (Microsoft ընեկրության համահիմնադիր),
- Մարիո Դրագի (Եվրոպական կենտրոնական բանկի նախագահ),
- Սերգեյ Բրին (Google-ի համահիմնադիր),
- Լարի Փեյջ (Google-ի համահիմնադիր):
«Մենք լուրջ քննադատության ենթարկվեցինք, երբ անցյալ տարի Ռուսաստանի նախագահին անվանեցինք աշխարհի ամենաազդեցիկ մարդ: Սակայն անցած տարվա ընթացքում Պուտինը բռնակցեց Ղրիմը, ուրիշի ձեռքերով պատերազմ սկսեց Ուկրաինայում և գազային պայմանագիր կնքեց Չինաստանի հետ, որի արժեքը գերազանցում է 70 մլրդ դոլարը: Այնպես որ, մեր ընտրությունը մարգարեական եղավ»,- ասված է Forbes-ի խմբագրակազմի հայտարարությունում:
Forbes-ի վարկանիշում ընդհանուր առմամբ ներառվել է 72 քաղաքական, տնտեսական և հասարակական համաշխարհային գործիչ:
Ամերիկյան ամսագիրը այսպիսի ցուցակ է կազմում 2009թ.-ից ի վեր:
Աշխարհի ամենաազդեցիկ մարդկանց վարկանիշը ներառում է Forbes-ի խմբագիրների միասնական կարծիքը: Խմբագիրները հաշվի են առնում գործիչների ֆինանսական ռեսուրսները, իշխանության օգտագործումն ու ծավալը, մարդկանց քանակը, որոնց վրա նրանք ազդեցություն ունեն: