«Ժառանգություն» կուսակցության և «Հիմնադիր խորհրդարանի» համատեղ ստեղծած «Նոր Հայաստան» քաղաքական միավորումը մարտի 23-ին հրապարակել է «Հայաստանում ազատ և արդար արտահերթ ընտրությունների անցկացման ճանապարհային քարտեզ»:
Ճանապարհային քարտեզը ներառում է երեք կետ` վարչախմբի հեռացում, անցումային կառավարում և ազատ և արդար արտահերթ ընտրությունների անցկացում:
«Քաղաքական և հասարակական ուժերը միավորվում են արտահերթ նախագահական և խորհրդարանական ընտրություններ անցկացնելու նպատակի շուրջ:
Միավորված ուժերն իրազեկման միջոցով ներգրավում են ժողովրդական լայն զանգվածներին:
Ժողովուրդը վերջնագիր է ներկայացնում քրեական ռեժիմի պարագլուխներին՝ Ժողովրդի վստահության կառավարություն նշանակելու և արտահերթ նախագահական ու խորհրդարանական ընտրություններ անցկացնելու պահանջով:
Ժողովուրդը խաղաղ քաղաքացիական անհնազանդության միջոցով (վարչական շենքերի շրջափակում, ճանապարհների ու փողոցների փակում և այլն) կաթվածահար է անում քրեական ռեժիմի կառավարման համակարգը՝ հասնելով իր վերջնագրի ընդունմանը և դրա պահանջի կատարմանը»,- նշված է առաջին կետում:
Համաձայն երկրորդ կետի` ժողովրդի վստահության կառավարությունն ապահովում է պետական կառավարման կայունությունը: Ժողովրդի վստահության կառավարությունն ապահովում է բոլոր անհրաժեշտ պայմանները ազատ և արդար արտահերթ ընտրություններ անցկացնելու համար: Սահմանադրական դատարանում սկսվում է ՀՀԿ-ի գործունեության արգելման վարույթ:
Երրորդ կետում նշվում է` իրավապահ մարմիններն ապահովում են ընտրական գործընթացը՝ խստորեն կանխելով ընտրակաշառքների, ընտրություններին միջամտելու և դրանց վրա ազդելու բոլոր այլ փորձերը: ԶԼՄ-ներն ազատորեն լուսաբանում են ընտրություններին մասնակցող բոլոր թեկնածուներին և քաղաքական ուժերին: Քաղաքացիական հանրությունն ազատորեն վերահսկում է ամբողջ ընտրական գործընթացը:
