Մշակույթի նախարարությունը սկզբունքորեն առարկություն չունի Վանաձոր քաղաքի Արցախի պուրակում ընթացող կառուցապատմանը՝ պայմանով, որ տարածքի բարեկարգման նախագիծը կներկայացվի լիազոր մարմնի համաձայնեցմանը։ Այս մասին Սիվիլնեթի հարցմանն ի պատասխան՝ ասել է մշակույթի նախարարի տեղակալ Արև Սամուելյանը։
Արցախի պուրակը ներառված է տեղական նշանակության հուշարձանների ցանկում: Այն պատմական նշանակություն ունի վանաձորցիների համար։ 1988-ի շարժումը Վանաձորում հենց այս պուրակում է սկսվել։ Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը ավելի վաղ հայտարարել է, որ պուրակում շինարարություն սկսելու հարցը հանրային քննարկման չի դրվել։
Արցախի պուրակի տարածքի սեփականատեր «Գ և Մ» ընկերության 100 տոկոս բաժնետերը Գարիկ Դանիելյանն է։ Նրան ամբողջությամբ պատկանում է նաև «Ազատամարտիկ Պարգև» ընկերությունը, որին Վանաձորի քաղաքապետ Մամիկոն Ասլանյանը սեպտեմբերի 29-ին թույլատրել է մինչև 2028-ը օգտագործել Վանաձորի արհեստական լճի տարածքը։ Արթուր Սաքունցի պնդմամբ՝ այն պատկանում է ոստիկանության Գուգարքի բաժնի նախկին պետ, ոստիկանության գնդապետ Արթուր Շահվերդյանին, որը նաև իրականացնում է Արցախի պուրակի շինարարությունը։
