Վարչապետ Նիկոլ Փաշինյանը Թվիթերի իր էջում գրել է, որ Հայաստանը սպասում է Ադրբեջանի դրական արձագանքին հայ-ադրբեջանական սահմանին 3 անցակետ բացելու ՀՀ կառավարության առաջարկի վերաբերյալ։
«Մի քանի ամիս է՝ պաշտոնապես շրջանառվում է Արևելյան Ադրբեջանի և Նախիջևանի միջև կապն ապահովելու համար հայ-ադրբեջանական սահմանին 3 անցակետ ստեղծելու վերաբերյալ Հայաստանի կառավարության որոշման նախագիծը։ Հայաստանը սպասում է Ադրբեջանի դրական արձագանքին»,- գրել է Փաշինյանը։
A draft decision of @armgov on opening of 3 checkpoints on the #Armenian–#Azerbaijani border to provide connection between eastern #Azerbaijan & #Nakhchivan is being formally circulated for several months. Government of #Armenia is waiting for positive reaction from Azerbaijan.
— Nikol Pashinyan (@NikolPashinyan) October 17, 2022
Հայաստանի ազգային անվտանգության ծառայությունը օգոստոսի 18-ին ներկայացրել էր հայ-ադրբեջանական պետական սահմանի երեք հատվածներում՝ Սոթքում, Երասխում և Քարահունջում, նոր սահմանային անցկետեր ստեղծելու նախագիծը։
Սահմանի նոր անցակետեր, ըստ նախագծի՝ ստեղծվելու են Գեղարքունիքի մարզի Սոթք համայնքից դեպի Քարվաճառ (Քելբաջար), Արարատի մարզի Երասխ համայնքից դեպի Սադարակ և Սյունիքի մարզի Քարահունջ համայնքից դեպի Էյվազլի ավտոճանապարհներին։
Օգոստոսի 4-ին կառավարության նիստի ընթացքում Հայաստանի վարչապետ Նիկոլ Փաշինյանը հայտարարել էր, որ «Հայաստանը պատրաստ է Ադրբեջանի և Նախիջևանի միջև կապ ապահովել՝ ՀՀ օրենսդրության համաձայն»։
