Կանադայի արտաքին գործերի նախարարությունը կոչ է անում Ադրբեջանին կատարել Արդարադատության միջազգային դատարանի որոշումը և ապահովել ազատ տեղաշարժը Լաչինի միջանցքով։
«Կանադան մտահոգված է Լեռնային Ղարաբաղում հումանիտար իրավիճակի վատթարացմամբ։ Մենք կոչ ենք անում Ադրբեջանին կատարել Արդարադատության միջազգային դատարանի որոշումը և թույլ տալ մարդկանց ու ապրանքների ազատ տարանցումը Լաչինի միջանցքով։ Բոլոր կողմերին կոչ ենք անում շարունակել խաղաղ երկխոսությունը»,- ասված է Կանադայի արտաքին գործերի նախարարության թվիթերյան գրառման մեջ։
Canada is concerned with the deteriorating humanitarian situation in Nagorno-Karabakh. We call on Azerbaijan to comply with the order of the ICJ to allow the free transit of people and goods in the Lachin corridor and urge all sides to continue peaceful dialogue.
— Foreign Policy CAN (@CanadaFP) August 3, 2023
2022-ի դեկտեմբերի 12-ին Ադրբեջանը կեղծ բնապահպանական պատճառաբանությամբ փակել է Արցախը Հայաստանին կապող միակ ճանապարհը։ 2023-ի ապրիլի 23-ին Ադրբեջանը Լաչինի միջանցքում՝ Հակարի գետի կամրջին կից, հսկիչ-անցագրային կետ է տեղադրել։
Հունիսի 15-ին Ադրբեջանի սահմանապահները Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով: Հայկական կողմի ձեռնարկած միջոցների արդյունքում փորձը կանխվել է: Հակարիի կամրջի մոտ տեղի ունեցած ադրբեջանական սադրանքից հետո Լաչինի միջանցքով բոլոր հումանիտար ուղևորափոխադրումներն ու բեռնափոխադրումները արգելվել են Ադրբեջանի կողմից։
Հուլիսի 26-ին Հայաստանի կառավարությունը հայտարարեց, որ հումանիտար օգնություն է ուղարկում Արցախ։ Նախապես հայտարարվել էր, որ հայկական կողմը բեռը կհասցնի Կոռնիձոր, որտեղից ռուս խաղաղապահներն այն կտեղափոխեն Արցախ։ Օգնությունը տեղափոխող բեռնատար մեքենաները դեռ կանգնած են հայկական անցակետի մոտ։
