Շոթա Կինչա, OC Media
Վրաստանի վարչապետ Իրակլի Ղարիբաշվիլին խորհրդարանի խոսնակի, իշխող կուսակցության առաջնորդի, Թբիլիսիի քաղաքապետի և իշխող կուսակցության բազմաթիվ պատգամավորների հետ հավաքվել են Թբիլիսիում հյուրանոցի բացմանը, որը կապված է «Վրացական երազանքի» հիմնադիր Բիձինա Իվանիշվիլիի հետ:
Չորեքշաբթի Ղարիբաշվիլին ելույթ է ունեցել Paragraph Tbilisi հյուրանոցի բացմանը, որտեղ նշել է «Վրաստանի հյուրընկալության ոլորտում նոր պարագրաֆ բացելու մասին» [բառախաղ հյուրանոցի անվան հետ – խմբ․]։
Վրաստանի վարչապետը թվարկել է հյուրանոցում առկա մի շարք հարմարություններ:
«Ուզում եմ նաև ընդգծել, որ հյուրանոցի միջազգային չափանիշներին համապատասխան ենթակառուցվածքը, ժամանակակից բազմաֆունկցիոնալ համալիրը, 220 համարները և տարբեր կատեգորիաների հինգ ռեստորաններն ու տարբեր սրահներ,- այս ամենը հնարավորություն է տալիս հյուրանոցին ընդունելու բարձր մակարդակի միջազգային միջոցառումներ, գործարար համաժողովներ, այցելուներ, հանգստացողներ, զբոսաշրջիկներ»,- ասել է նա։
Ղարիբաշվիլին գովաբանել է «Վրացական երազանքի» հիմնադիր, միլիարդատեր Բիձինա Իվանիշվիլիին։ Չնայած Իվանիշվիլին հայտարարել է քաղաքականությունից հեռանալու մասին, շատերը համարում են, որ նրա ձեռքում են կառավարության ղեկավարման թելերը, ինչը Ղարիբաշվիլին և իշխող կուսակցության մյուս անդամները հերքում են:
Վրաստանի հաշտեցման նախարար Թեա Ախվլեդիանին հյուրանոցի բացմանը։
«Ես կցանկանայի ընդգծել նախագծի գլխավոր հեղինակի՝ պարոն Բիձինա Իվանիշվիլիի դերը ու կրկին շնորհակալություն հայտնել նրան նման կարևոր, ուշագրավ նախագծի իրականացման համար»,- ասել է Ղարիբաշվիլին:
«Ես կցանկանայի ընդգծել նաև պարոն Բիձինա Իվանիշվիլիի մեծածավալ բարեգործությունները, որ կազմում են ավելի քան 3 միլիարդ դոլար, իսկ այժմ էլ հարյուր միլիոնավոր դոլարներ ներդրվել են մեր երկրի զարգացման համար»,- ասել է Ղարիբաշվիլին:
Գովազդներ
Հյուրանոցի բացման արարողությունից հետո Վրաստանի կառավարությունն իր սոցիալական մեդիայի ալիքներում մի քանի գրառում է արել Paragraph Tbilisi-ի վերաբերյալ:
Հյուրանոցի պատկերները, որ տեղադրել է Վրաստանի կառավարությունն իր ֆեյսբուքյան էջում։
Վարչապետի գրասենյակի մամլո հաղորդագրությունում կրկին նշվում է, որ հյուրանոցն ունի «220 սենյակ, հինգ ռեստորան, երեք հարկերում բարձրակարգ սպա-կենտրոններ և բարձր տեխնոլոգիաների հանդիպումների և կոնֆերանսների տարածքներ»։
Ֆեյսբուքյան հրապարակման հետ 14 րոպե տևողությամբ տեսանյութ կա՝ կադրեր, թե ինչպես է Վրաստանի վարչապետը զննում հյուրանոցի համարները, փոքրիկ մարզասրահը, լողավազանը և սաունան:
Paragraph Tbilisi-ն զբոսաշրջային մի քանի նախագծերից մեկն է, որին աջակցել է Վրաստանի համատեղ ներդրումների հիմնադրամը (Georgian Co-Investment Fund – GCF): Նախորդ տարիներին այդ նախագծերից մեկը՝ Panorama Tbilisi-ն, մեծ հակազդեցության արժանացավ Թբիլիսիում:
GCF մասնավոր բաժնետիրական հիմնադրամը հիմնադրել է Իվանիշվիլին 2013-ին՝ վարչապետի պաշտոնից հեռանալուց անմիջապես առաջ։ Հիմնադրամի հայտարարված նպատակն է ներգրավվել և օգնել Վրաստանում խոշոր ենթակառուցվածքային նախագծերի իրականացմանը, որոնք նպաստում են երկրի զարգացմանը։
2013-ի սեպտեմբեր. վարչապետ Բիձինա Իվանիշվիլին GCF-ի բացմանը:
Հիմնադրամի մի քանի նախկին աշխատակիցներ պետական պաշտոններ են զբաղեցրել, այդ թվում՝ Վրաստանի ենթակառուցվածքների և տարածաշրջանային զարգացման նախարար Իրակլի Կարսելաձեն, որն անձամբ մասնակցել է Panorama Tbilisi վիճահարույց նախագծին, և Դավիթ Փերաձեն, որը ներկայում Վրացական երկաթուղիներ պետական ընկերության տնօրենն է։
Քննադատները մատնանշում են նաև խորհրդանշական գներով պետական սեփականություն հանդիսացող հողատարածքների փոխանցումը GCF-ին և նրա դուստր ձեռնարկություններին:
