Թուրքական լրատվականները թիրախավորում են թուրքական ծագմամբ նիդեռլանդացի հինգ խորհրդարանականների՝ նրանց անվանելով «դավաճան»։ Պատգամավորները նաև սպառնալիքներ են ստանում սոցիալական ցանցերում, նրանցից երկուսը տեղեկությունը հաստատել են նիդեռլանդական RTL Nieuws-ի հետ զրույցում․ այս մասին գրում է NLTimes պարբերականը։ Նիդեռլանդների Ներկայացուցիչների պալատի նախագահը երևույթն «անընդունելի» է որակել։
Անցյալ շաբաթ Նիդեռլանդների խորհրդարանի ստորին՝ Ներկայացուցիչների պալատը ճանաչել էր Հայոց ցեղասպանությունը։
NLTimes-ը գրում է, որ շաբաթ օրը թուրքական En Son Haber-ը թիրախավորել է թուրքական ծագմամբ պատգամավորներ Դիլան Եսիլգյոզին, Ջեմ Լաչինին, Սադեթ Կարաբյուլութին, Զիհնի Օզդիլին և Նևին Օզյությոքին։
«Հինգ թուրքեր, որոնք դավաճանել են հայրենիքին»,- գրել է կայքը։ Թուրքական այլ լրատվամիջոցներում ևս նմանաբովանդակ հրապարակումներ են եղել։
Այդ օրվանից ի վեր խորհրդարանականները ստանում են սպառնալիքներ սոցիալական ցանցերում։
«Ես մշտապես ատելություն պարունակող հաղորդագրություններ եմ ստանում։ Ինձ դատապարտում են»,- ասել է Լաչինը նիդեռլանդական RTL Nieuws-ին։
Սպառնալիքների փաստը հաստատել է նար Օզդիլը․ «Շատ բաներ եմ ստանում։ Ամենաստեղծագործ բառապաշարով հայհոյանքներ, նաև՝ սպառնալիքներ։ Ես սքրինշոթեր եմ պահում և հաղորդում եմ տալու ամենակոնկրետ սպառնալիքների հարցով»։
Պատգամավորները նշել են, որ չեն պատրաստվում նահանջել։
«Լուռ չեմ մնալու։ Ես Նիդեռլանդների խորհրդարանի անդամ եմ և հպարտ եմ դրանով։ Այս հաղորդագրությունները ամոթալի են, սա իրական հրեշացում է։ Ուղերձը հետևյալն է․ «Դու ունես թուրքական ծագում, հետևաբար չես կարող այդպես մտածել։ Դա շատ վատ է, առնվազն»,- ասել է Օզդիլը։ Լաչինը հավելել է․ «Ես կարծում եմ՝ սա շատ վատ է։ Ես ծնվել և մեծացել եմ այստեղ։ Ես պարզապես ժողովրդի նիդեռլանդացի ներկայացուցիչ եմ»։
Խորհրդարանի ստորին պալատի նախագահ Խադիջա Արիբը պատգամավորների թիրախավորումն անվանել է «անընդունելի»։ Նրա համոզմամբ՝ ժողովրդի ընտրյալներն ազատ են արտահայտելու իրենց կարծիքը։
Փետրվարի 22-ին Նիդեռլանդների խորհրդարանն ընդունել է Հայոց ցեղասպանությանը վերաբերող երկու օրինագիծ, որոնցից մեկով 1915թ․ տեղի ունեցածը որակվում է որպես ցեղասպանություն, մյուսով նախատեսվում է ապրիլի 24-ին՝ Հայոց ցեղասպանության զոհերի հիշատակի օրը, Հայաստան ուղարկել բարձրաստիճան պաշտոնյա։
Երևանն ու Անկարան արձագանքեցին Նիդեռլանդների խորհրդարանի որոշումներին։
Թուրքիայի և Նիդեռլանդների հարաբերությունները լարվեցին անցյալ տարի, երբ Թուրքիայում սահմանադրական հանրաքվեից առաջ արգելվեց թուրք նախարարների մուտքը Նիդեռլանդներ՝ այնտեղ քարոզարշավ իրականացնելու համար։ Վերջերս հարաբերությունները վերականգնելու փորձերը մատնվեցին անհաջողության, և Նիդեռլանդները պաշտոնապես հետ կանչեց Թուրքիայում իր դեսպանին։
