ՍիվիլՆեթը հարցազրույց է ունեցել Պոլսում լույս տեսնող «Մարմարա» օրաթերթի հրատարակության տնօրեն Արի Հատտէճեանի հետ։
– Պարոն Հատտէճեան, որո՞նք են Պոլսո հայ համայնքի առջև ծառացած հիմնական խնդիրները։
– Կարծում եմ՝ քաղաքական բնույթի բարդ հարց է: Բայց որպես լրագրող կարող եմ ասել, որ համայնքի ամենամեծ խնդիրներից մեկը ոչ միասնականությունն է, քանզի չենք կարողանում համախմբվել և համատեղ ուժերով հարցեր լուծել: Ֆինանսական խնդիրների ենք բախվում: Թուրքիայի տնտեսության վիճակն անմիջականորեն ազդում է հայկական դպրոցների և համայնքային այլ մարմինների վրա: Անշուշտ, ունենք վաքըֆներ, որոնց մեջ կան իհարկե ֆինանսական մեծ կարողություններով աչքի ընկնող հաստատություններ, որոնք փորձում են օգնել դպրոցներին, համայնքային կարիք ունեցող կազմակերպություններին, ընչազուրկ մարդկանց, սակայն այդ ջանքերը բավարար չեն: Կարծում եմ պետք է միանալ, համախմբվել ընդհանուր ծրագրերի շուրջ: Ցավոք, սա է, որ մեզ չի հաջողվել իրականացնել: Վաքըֆներում նոր ղեկավարություն է ընտրվել և հույս ունենք, որ նոր պատասխանատուները ավելի արդյունավետ քաղաքականություն կորդեգրեն ընդհանուր խնդիրների լուծման համար:
– Ինչպե՞ս եք օրաթերթը հասցնում ընթերցողներին, ովքե՞ր են նրանք։
– Թերթը տպվում է ամեն օր՝ կեսօրին: Ունենք առաքիչներ, որոնք գալիս են, թերթը տանում և տարածում հայաբնակ թաղամասերում՝ ընդհուպ մինչև հասցնելով ընթերողների տները: Իսկ առաքիչների մյուս մասը թերթերը հանձնում է խանութներին, որոնք էլ գնում են դրանք:
– Ինչպե՞ս կգնահատեք հայոց լեզվի իմացությունը հայ համայնքում։ Այն ազդու՞մ է թերթի տպագրության քանակի վրա:
– Դժբախտաբար, հայ համայնքում աստիճանաբար հեռանում են հայախոսությունից՝ դառնալով ամբողջովին թրքախոս: Որպես կանոն, դժվարանում են հայերեն կարդալ, անգամ դժվարությամբ են խոսում, հաղորդակցվում: Անշուշտ, այդ գործոններն ազդում են մեր թերթի՝ «Մարմարայի» գործունեության վրա: Դրա հետևանքներից մեկն այն է, որ տպաքանակն օր օրի պակասում է: Սակայն ոչինչ չենք կարող փոխել, պետք է շարունակենք մեր գործունեությունը:
***
«Մարմարան» Պոլսում լույս տեսնող հայալեզու օրաթերթերից մեկն է: Այն հրապարակվում է 1940-ից: Օրաթերթը տեղ է հատկացնում Թուրքիայի ներքաղաքական կյանքին՝ որպես աղբյուր օգտագործելով թուրքական մամուլի նյութերը։ Օրաթերթը անդարդառնում է նաև պոլսահայերի եկեղեցական, դպրոցական, մշակութային իրադարձություններին։
Գեորգի Միրզաբեկյան, Ստամբուլ
