Հայաստանը ստացել է խաղաղության պայմանագրի վերաբերյալ Ադրբեջանի հերթական առաջարկները, փետրվարի 21-ին լրագրողների հետ զրույցում հայտարարել է Անվտանգության խորհրդի քարտուղար Արմեն Գրիգորյանը։
Արտգործնախարար Արարատ Միրզոյանը խաղաղության պայմանագրի վերաբերյալ ադրբեջանական նախորդ առաջարկներից հետո ասել էր, որ «որոշ հոդվածներով հայկական կողմը որոշակի հետընթաց է տեսնում»։ Արմեն Գրիգորյանի խոսքով՝ վերոնշյալ հետընթացը նոր առաջարկներից հետո էլ պահպանվում է։
«Որոշ հարցերում, որտեղ նախկին հետընթացը եղել է, դա պահպանվել է։ Բայց նաև հնարավորություն կա աշխատելու։ Ուզում եմ խաղաղության պայմանգրի բանակցությունները դիտարկենք գործընթաց՝ ակնկալելով, որ երբեմն կարող է առաջընթաց լինել, երբեմն կարող է հետընթաց լինել։ Մենք շարունակում ենք հավատարիմ մնալ խաղաղության օրակարգին»,- ասել է Գրիգորյանը։
ԱԽ քարտուղարի խոսքով՝ հետընթացը վերաբերում է «սկզբունքային հարցերին»։
Նա նշում է, որ խաղաղության պայմանագրի շուրջ քննարկումները կշարունակվեն արտգործնախարարների մակարդակով առաջիկայում նախատեսվող հանդիպմանը, որի մասին հայտարարվել էր Փաշինյան-Ալիև մյունխենյան հանդիպումից հետո։
Հայկական կողմը խաղաղության պայմանագրի վերաբերյալ Ադրբեջանի առաջարկները փոխանցել էր հունվարի 4-ին։
***
Հոկտեմբերի 30-ին ԱԺ-ում 2024-ի պետական բյուջեի քննարկման ժամանակ վարչապետ Նիկոլ Փաշինյանը հայտարարել էր․ «Ադրբեջանի հետ հարաբերությունների կարգավորման և խաղաղության երեք հիմնական սկզբունքները համաձայնեցված են։ Եթե կողմերը մնում են հավատարիմ այդ համաձայնեցված սկզբունքներին, խաղաղության պայմանագրի ստորագրումը դառնում է իրատեսական»։
Արտաքին գործերի նախարարի տեղակալ Վահան Կոստանյանն էլ ասել էր, թե Երևանն ու Բաքուն խաղաղության պայմանագրի ո՞ր հարցերում տարաձայնություններ ունեն․ «Մեզ համար շարունակում է սկզբունքային մնալ սահմանագծի հստակեցման հարցը։ Ադրբեջանի հետ հարաբերությունների կարգավորման հնարավոր փաստաթղթի անկյունաքարը պետք է լինի 2 երկրների միջև սահմանագծի ամրագրումը։ Կարևոր հարցերից է մնում նաև ապաշրջափակման գործընթացի չորս սկզբունքների արձանագրումը, որոնք նաև արձանագրված են Գրանադայի հայտարարության մեջ։ Կարևոր է լինելու նաև վեճերի կարգավորման հստակ մեխանիզմի ստեղծումը»,- նշել էր Կոստանյանը։
