Ստեփանակերտի օդանավակայանը (Ֆոտոլուր):
Ադրբեջանը ոչ թռիչքային գոտի է հայտարարել «օկուպացված տարածքների օդային տարածությունը և ըստ կարգի՝ այդ մասին տեղեկացրել է Քաղաքացիական ավիացիայի միջազգային կազմակերպության բոլոր անդամներին»։ Այս մասին ասված է Ադրբեջանի արտգործնախարարության՝ ղարաբաղյան ուղղաթիռի խոցման կապակցությամբ նոյեմբերի 12-ին տարածած հայտարարությունում։
Ադրբեջանը իրադրության սրման պատասխանատվությունը դնում է Հայաստանի վրա։ «Լարվածության պահպանման հիմնական պատճառը ադրբեջանական օկուպացված տարածքներում Հայաստանի Հանրապետության զինված ուժերի գտնվելու հանգամանքն է։ Այդ իսկ պատճառով առանց այդ էլ լարված իրադրության,- որի մասին ադրբեջանական կողմը բազմիցս հայտարարել է,- սրման ամբողջ պատասխանատվությունը Հայաստանն է կրում»,- ասված է հայտարարությունում։
Ադրբեջանական լրատվամիջոցները հաղորդել են, որ Ադրբեջանի պաշտպանության նախարարությունը ուղղաթիռը խոցած ադրբեջանցի զինծառայողին պարգևատրել է «Մարտական սխրանքի 3-րդ աստիճանի» շքանշանով։
Ադրբեջանի՝ Ղարաբաղը ոչ թռիչքային գոտի հայտարարելուն Twitter-ի իր միկրոբլոգում անդրադարձել է ԼՂՀ վարչապետի մամուլի խոսնակ Արտակ Բեգլարյանը։ «Հա-հա-հա։ Ադրբեջանի ԱԳՆ-ն Ղարաբաղի տարածքը ոչ թռիչքային գոտի է հայտարարել։ Դա նույնն է, ինչ ԼՂՀ ԱԳՆ-ն ոչ թռիչքային գոտի հայատարարի Բաքվի տարածքը :)»,- գրել է նա։
hahaha! #Azerbaijan MFA declared #Karabakh territory “no-fly zone”. It’s like #NKR MFA declares #Baku territory “no-fly zone” 🙂
— Artak Beglaryan (@Artak_Beglaryan) November 13, 2014
Ղարաբաղա-ադրբեջանական սահմանի արևելյան հատվածի օդային տարածքում նոյեմբերի 12-ին` ժամը 13.45-ի սահմաններում, ուսումնավարժական թռիչքի ժամանակ ադրբեջանական զինված ուժերը խոցել են ղարաբաղյան ռազմաօդային ուժերի ՄԻ-24 ուղղաթիռը, որի հետևանքով զոհվել են ուղղաթիռում գտնվող երեք հայ զինվորականները։
Հայաստանի արտգործնախարարությունն ու պաշտպանության նախարարությունը սադրանք են որակել ղարաբաղյան ուղղաթիռի կործանումը: Հայաստանի ՊՆ խոսնակ Արծրուն Հովհաննիսյանը զգուշացրել է, որ ուղղաթիռի խոցման հետևանքները Ադրբեջանի համար «ցավոտ են լինելու»: Նա ընդգծել է, որ ուղղաթիռը զինված չի եղել և մարտական գործողություն չի կատարել։
Ղարաբաղյան ուղղաթիռի խոցման կապակցությամբ իր մտահոգությունն է հայտնել ԵԱՀԿ գլխավոր քարտուղար Լամբերտո Զանիերը` նշելով, որ «միջադեպը հակամարտության սրման վտանգ է պարունակում»:
Հայտարարությամբ հանդես է եկել նաև Եվրամիությունը՝ կոչ անելով հետաքննել ուղղաթիռի խոցման միջադեպը։
