Թուրինի «Յուվենտուսի» պաշտպան Լեոնարդո Բոնուչիի անհատական մարզիչ Ալբերտո Ֆերարինին պատմել է` ինչ հատուկ մեթոդներով են պայքարել «Ռոմայի» առաջատարների դեմ:
Հիշեցնենք, որ հոկտեմբերի 5-ին կայացած Իտալիայի առաջնության 6-րդ տուրի կենտրոնական խաղում «Յուվենտուսը» 3:2 հաշվով առավելության հասավ «Ռոմայի» նկատմամբ, թուրինցիների հաղթական գոլը խփեց հենց Բոնուչին:
«Շաբաթ օրը ես ու Լեոնարդոն 3 ժամ միասին ենք անցկացրել` նախապատրաստվելով հանդիպմանը: Պարապմունքի ավարտին ես նրան սխտորի համով կոնֆետներ հյուրասիրեցի: Հարյուրավոր տարիներ առաջ զինվորների կերակուրը սխտորով են պատրաստել, որպեսզի նրանք ուժեղ լինեն, առողջ ու ողջամիտ: Լեոն էլ նրանց նման մի զինվոր է, իսկ այդ կոնֆետներն ուտելով նա ասես վերադառնում է իր արմատներին:
Բացի այդ, ես Լեոյին ասացի, որ հանդիպման ժամանակ նա սխտորի հոտով շնչի Տոտտիի և Ժերվինյոյի դեմքին. կարևորը հաղթելն է»,- Ֆերարինիի խոսքն է մեջբերում Football Italia-ն:
