Կառավարությունը դեկտեմբերի 28-ին հավանություն տվեց Հայաստանի Հանրապետության և Եվրոպական միության միջև ստորագրված համապարփակ և ընդլայնված գործընկերության համաձայնագրին։
Գործադիրին համաձայնագիրը ներկայացրեց արտաքին գործերի նախարար Էդվարդ Նալբանդյանը։
Ըստ հիմնավորումների՝ համաձայնագիրը կանոնակարգում է ՀՀ-ԵՄ քաղաքական և տնտեսական բնագավառում երկխոսությունը, ոլորտային համագործակցությունը և առևտրային հարաբերությունները։ Կարևորում և խրախուսում է քաղաքական և տնտեսական բարեփոխումների շարունակականության ապահովումը։
Ըստ ԱԳՆ-ի՝ համաձայնագիրը կարևորվում է նրանով, որ նոր՝ գործընկերային մակարդակի է բարձրացնում ՀՀ-ԵՄ երկկողմ հարաբերությունները և կոչված է դրանք կարգավորելու գալիք տարիների ընթացքում։ Այն ավելի ընդգրկուն է և համապատասխանեցվել է երկկողմ հարաբերությունների էությանն ու խորությանը։
Համապարփակ և ընդլայնված գործընկերության համաձայնագիրը ստորագրվել է նոյեմբերի 24-ին՝ Բրյուսելում Արևելյան գործընկերության 5-րդ գագաթաժողովի ընթացքում։
