Հայաստանի արտաքին գործերի նախարար Արարատ Միրզոյանը մարտի 1-3-ը աշխատանքային այցով կգտնվի Թուրքիայում, հայտնում է ՀՀ ԱԳՆ խոսնակ Անի Բադալյանը։
Միրզոյանը մասնակցելու է Անթալիայի դիվանագիտական ֆորումին։ Նախատեսված են նաև երկկողմ հանդիպումներ։
On March 1-3 🇦🇲FM @AraratMirzoyan will pay a working visit to #Antalya to participate in @AntalyaDF.
Participation in discussions & bilateral meetings are scheduled. pic.twitter.com/wD0UjqxgQi
— Ani Badalyan, 🇦🇲 MFA Spokesperson (@ArmSpoxMFA) February 29, 2024
Միրզոյանը Անթալիայի դիվանագիտական ֆորումին մասնակցել էր նաև 2022-ի մարտին։ Նախորդ տարի ևս Հայաստանի ԱԳՆ ղեկավարը մեկնել էր Թուրքիա։ 2023-ի փետրվարին Արարատ Միրզոյանը երկրաշարժից տուժած Ադիյաման քաղաքում հանդիպել էր որոնողափրկարարական աշխատանքներ իրականացնող ՀՀ փրկարարական խմբին և Անկարայում բանակցություններ էր վարել Թուրքիայի ԱԳ նախարար Մևլութ Չավուշօղլուի հետ։
***
Հայ-թուրքական հարաբերությունների կարգավորման գործընթացը մեկնարկել է 2022-ի սկզբին։ Հայաստանի և Թուրքիայի հատուկ ներկայացուցիչներ Ռուբեն Ռուբինյանի և Սերդար Քըլըչի առաջին հանդիպումը կայացել է հունվարի 14-ին՝ Մոսկվայում։ Դրանից հետո բանագնացները ևս երեք հանդիպում են անցկացրել Վիեննայում։
2022 հուլիսի 1-ին անցկացված չորրորդ հանդիպման ընթացքում Ռուբինյանն ու Քըլըչը պայմանավորվել էին հնարավոր ամենասեղմ ժամկետներում Հայաստան-Թուրքիա ցամաքային սահմանը հատելու հնարավորություն ապահովել, համապատասխանաբար, Հայաստան և Թուրքիա այցելող երրորդ երկրների քաղաքացիների համար։ Պայմանավորվածություն էր ձեռքբերվել նաև հնարավոր ամենասեղմ ժամկետներում Հայաստան-Թուրքիա ուղիղ օդային բեռնափոխադրումների իրականացման շուրջ։
