Իրանի նախագահ Մահմուդ Ահմադինեժադը պաշտոնական այցով ժամանել է Եգիպտոս։ Կահիրեում նրան ընդունել է Եգիպտոսի նախագահ Մուհամադ Մուրսին, հաղորդում է BBC-ն։
Սա իրանցի առաջնորդի առաջին այցն է Եգիպտոս 1979թ․ ի վեր, երբ Իրանում տեղի ունեցավ Իսլամական հեղափոխությունը։
Եգիպտոսի իշխանություններն այդ ժամանակ որոշում ընդունեցին Իսրայելի հետ ստորագրել քեմփդեյվիդյան խաղաղության համաձայնագրերը, և Թեհրանն ի պատասխան խզեց Կահիրեի հետ դիվանագիտական հարաբերությունները։
Եգիպտոսում Ահմադինեժադը մասնակցելու է Իսլամական համագործակցության կազմակերպության համաժողովին։
Անցյալ տարվա օգոստոսին Եգիպտոսի նախագահ Մուհամադ Մուրսին այցելել էր Թեհրան՝ մասնակցելու Չմիացած երկրների շարժման գագաթաժողովին։ Դա Եգիպտոսի առաջնորդի առաջին այցն էր Իրան վերջին 30 տարվա մեջ։